TURA: Mahatma Gandhi National Rural Employment Scheme (MGNREGS)-ni ning·o badiaba badiaba village employment council (VEC)-ni dilgiparang, mitam manderangna baditaba king job card-rangko on·e kam ka·atenga aro banoba banobade sigimin manderangni bimingrangoba tangka paisarangko oke ra·enga ine West Garo Hills a·jani Demdema C&RD Block-ni ning·o donggipa Phulbari jolrango job card donggipa manderang, a·dokni Chief Minister-na badi ka·doangaha.
Demdema block-ni ning·o donggipa Pabomari VEC-o job card-chi kam ka·e cha·enggipa manderangni badi ka·doangani gitade, mitam VEC-ni president aro secretary-rang, an·tangtangni council-o kam ka·giparangko bariatna gita sigimin manderangni bimingrangko aro sorkario kam ka·enggipa manderangkoba job card donggiparang ine segattokenga aro tangka paisarangko an·tangtang oke cha·tokengachim.
Ia VEC-ni president aro secretary, adita salrangna skang ong·atanggipa GHADC election-o susae, an·tangtangni kamrangko jiktangtangna on·skaahachim ineba job card donggipa manderang matnangataha.
Koborko on·ani gitade, VEC-ni president Jahanuddin Sheikh, an·tangni kamko jikgipa Noor Banu Bibi-na on·skaaha aro VEC-ni secretary Enamul Islam-ba kamtangko an·tangni jikgipa Lovely Begum-na on·skae GHADC election-o susaahachim indiba uamang chu·sokgipa ong·na man·jahachim.
Ia VEC-ni dilgiparang, an·tangtangni council-o sak 34 manderangni bimingrangko sedapaha indiba ia bimingrangoni mitamrangara sigiminrangsa aro mitamrangara biming dingtangate setaigiminrangsa ong·achim ine job card holder-rang parakataha.
Chief Minister-na badi ka·doangani gitade, ia VEC-o sorkarioniko dormaha man·enggipa skulni headmaster, booth level organiser, skulni skigipa, ASHA health worker aro Anganwadi worker-rangba biming dongpilahachim.
Iani bidingo toe janapatengon, skulni headmaster Golam Hussain minggipa mandean, Galam Hussain aro Golap Hussain ineba mingjite, tangka paisarangko man·dapenga ine job card-chi kakketo kam ka·e cha·enggipa manderang parakataha.
Iani bidingo am·sandianirangko dakenba, kosako janapatgimin VEC-ni president aro secretary-ni kosako rakgipa ja·kurangko de·china gitaba uamang Chief Minister-ko didiataha.
