SHILLONG: Covid-19 saenggipa aro uamangni nokdangna hospital-o sannaniko ra·on gamna nangani koros bilongani a·sel neng·nikako man·tokengani gimin Meghalaya sorkari, sannaniko korosko MHIS-o napatna tik ka·aha.
Medical expert-rangoni agan-ku·pattianiko ra·chaksoa ja·man Health Minister Prestone Tynsong indine aganaha, “Covid-19-na sannaniko ra·enggipa private hospital-rang-ni korosko MHIS-o napatna sorkari tik ka·aha. Una agreba sorkari MHIS-o dakchakaniko a·palbatatgen.
“Covid saenggipa bang·arangkon hospital-o sannenga aro gamna nangani bill bang·en sokenga. MHIS-o 60% ni gita koroskosan dakchakaniko man·a. Uni gimin Covid sananiko ra·giparangna dakchakna tik ka·aha, ine Tynsong agandapaha.
Mingbonga rokomo dakchakaniko on·gen—
Oxygen nanggijagipa General ward-na salprako gong 7,000
Oxygen nanggipa General ward-na salprako gong 11,500
Ventilator donggijagipa ICU HDU -na salprako gong 14,000
Non-Invasive Ventilation, ICU-na salprako gong 18,000
Invasive Ventilation, ICU-na salprako gong 20,000
Dakchakna tik ka·gimin niamko August 15 tarik, 2021-oni ja·rikgen.
Private hospital-rango sannaniko ra·giparang lak gapnapile korosko gamna nangani gimin sorkari, ia ja·kuko de·aha. Una agreba sorkari, mission aro private hospital-rangna chakpae ICU oxygen plant-ko bariatna tik ka·aha.
Indake health department-ni parakatani gita, Covid-19 sagiparang bang·batan delta variant ong·a.
“Ia bilsio sokgipa covid-ni gnigipa chango April jaoni saa man·giparangoni bang·bataan delta variant-ni ong·a, uan kenbegnigipa ong·bata, ineba Tynsong aganaha.
Sabisi giproroaniko champengna sorkari raken jotton ka·enga unbaksana a·dokni sakantian daito ra·gipa ong·e sorkarini on·gimin niamrangko ja·rikna nanggen. Health worker, doctor, nurse aro covid-ko warachakna kam ka·giparang salantion neng·takna man·pilgija salang-walang kam ka·enga, an·chingni simsakgijani a·sel uamangsa cha·na-tuna somoikon man·piljaenga ine Tynsong agandapaha.
Uandake health department, manderangko covid tika su·china mol·molataha. Meghalaya-o 45% manderang da·odipte covid tikako su·manaha.
