SHILLONG: Re·anggipa Sonibar saloni Robibar salona konta 24-ni gisepo Meghalaya a·dok gimiko sak 9 manderang COVID-19 man·e siangtaiaha aro apsan salon sak 540 manderang COVID man·dapskaaha.
Konta 24-ni gisepo COVID-19 man·dapgipa sak 540 manderangko channe da·o Meghalaya a·dok gimiko COVID-19 man·e dongenggiparang gimik sak 5037 gapengaha aro ia apsan salon mande sak 9 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1163 gapskaengaha.
Konta 24-ni gisepo COVID man·gipa sak 540 manderangoni sak 4-de East Garo Hills-o, sak 5-de East Jaintia Hills-o, sak 226-de East Khasi Hills-o, sak 1-de North Garo Hills-o, sak 82-de Ri Bhoi a·jao, sak 1-de South Garo Hills-o, sak 5-de South West Garo Hills-o, sak 48-de South West Khasi Hills-o, sak 34-de West Garo Hills-o, sak 82-de West Khasi Hills-o aro sak 52-de West Jaintia Hills a·jao ong·a.
Salsani gisepo COVID man·e sianggipa sak 9 manderangoni sak 5-de East Khasi Hills-o, sak 2-de Ri Bhoi a·jao, sak 1-de West Garo Hills-o aro sak 1-de East Jaintia Hills a·jao ong·a.
Ia apsan salon gimik sak 817 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 62,971 gapskaengaha.
