TURA: West Garo Hills a·jani Dadenggre civil sub-division-ko dingtang district songchina dabiengon, Raksamgre civil sub-division-ni ning·o ga·akgipa dingtang dingtang biaprang, jekai Raksamgre, Phulbari, Tikrikilla, Pedaldoba aro uandakgipa songrangko Dadenggre district ning·o chapatjachina gita jolni dingtang dingtang NGO-rang aro jolo songdongenggipa manderang dabiangskaaha.
Iani bidingo Garoland State Movement Committee (GSMC) Pedaldoba regional unit aro Garo Students Union (GSU) Raksamgre Western Zone-ni dilanichi dingtangmancha jinma tom·aniko Matchokgre songni Silaom Public School-o ong·atangaha aro ia tom·anio dingtang dingtang dolrang aro dingtang dingtang songni nokma laskarrang dongpae bakko ra·angtokaha ine u·iataha.
GSMC Pedaldoba aro GSU Raksamgre dolrangni u·iatani gitade, Raksamgre sub-division-ni ning·o donggipa songrangara Dadenggre-oni ramarang jakkeja aro chel·grikaniko niatgenchimoba Tura-na baten chel·batpilani gimin ia jolrango songdongenggipa manderang, ia songrangko Dadenggre district-o chapatna nangniktokjaenga.
“Iako aganengon chinga Dadenggre district-na dabianiko jegalenga ong·ja indiba skango gitan chinga da·oba Dadenggre-ko district songchina dabianio bakrimkuenga. Indake ong·genchimoba Dadenggre-ona ramarang jakkejani gimin aro chel·aba batani gimin chinga da·o dipet dingtang Dadenggre district-o chapatako man·na nangnikjaenga. Ia neng·nikani giminsa chinga Raksamgre-ko sub-division songchina dabie man·aba man·aha indiba da·o chinga Dadenggre-ko district songanio bak ong·piltaigenchimode skango gitan apsan daken neng·nikanirangko chagrongna nangtaigen,” ine dolgni NGO-ni dilgiparang parakataha.
Indake ong·engon Raksamgre civil sub-division-ni ning·o songdongenggipa manderangba mikkangchi dingtang district-ko dabianggen ineba dolgni NGO-rang parakataha.
