SHILLONG: Darang dolrangan sorkariko chalaigipa dolode ong·e dongkamna man·jawa aro gisepode opposition doloba ong·na nangaia ine Opposition Congress dolni dilgipa Mukul Sangma talatangenba, doltangtango kakket ong·e dongchina dilgiparangko didiangaha.
“Basakobade an·ching sorkariko chalaigipa aro basakobade opposition doloba ong·na nangaia maina indakesa democracy-kode chalaia. Pangnande an·ching sorkariko chalaigipao ong·kamna man·jawa aro iana an·ching pilakan an·tangtangni tarie dongna nanga,” ine Sangma aganaha.
Meghalaya a·dokni Congress dolo meligrikjaenga aro mitam MLA-rang gipin dolchi katna miksongenga ine sing·anina Mukul ia kattarangko aganaha.
2008 bilsini election-ni ja·man 2009 bilsioba Congress sorkariko rikpiltaiahachim ine janapatengon, “2009 bilsioni 2018 bilsionade bilsisku ong·ahani gimin ian namen ru·utbegipa somoi ong·aha aro una skang 2003 bilsioni 2008 bilsionaba Congress sorkariko chalaiahachim. 2008 bilsioni 2009 bilsini giseposan bilsisana chinga sorkario ong·jaha, uni gimin politics-ni kamko an·ching dilgiparang ong·e ma·sina nanga. Democracy-kode indakesa chalaia aro an·ching pangnan opposition-ni kamkoba ka·na an·tangtangko tarina nanga,” ine Opposition dolni dilgipa parakataha.
Meghalaya a·doko Congress dolko dilgiparangni gimin janapatengon, a·dokoba Congress dolko dilna changgipa manderang chu·onga gitan donga aro ua an·tangko gipin dilgiparang baksa tosusagrikna sikja ine Mukul parakataha.
“An·ching doltangna aro manderangna dangdike on·na an·tangtangni changa sapaniko ma·sie ra·na nanga. An·ching a·dokna aro a·dokni manderangna dangdike on·na gitasa political dolo napaha aro an·ching doltangko bilakbatatosa an·tangtangba bilakroroa,” ineba Sangma aganaha.
Badiaba political dolo MLA saksa, ba sakgnimangmangchi bilgrigipa dolsan ong·aigenchimode namgipa sorkariko rikna man·jawa ineba Opposition dolni dilgipa parakataha.
“A·dokko namroro silroroatna nangnikgenchimode an·ching skanggipa dilna changgipa manderang donggipa dolkosan niatchengna nanggen aro indakgipa dolrangni jakosa a·dok naljokaniko man·gen,” ine Sangma aganaha.
