TURA: COVID-19 giproroani somoirangoba Agia-Medhipara-Phulbari-Tura (AMPT) rama gita ro·ong salruragipa truck garirangko re·rurana on·engani a·sel ia jolni manderangna kenchakna nanganiko ra·baenga ine Garo Students Union (GSU) Raksamgre regional unit parakatenba, ia rama gita ro·ong salruragipa truck garirangni re·ruraaniko ta·raken champengatchina dabiangaha.
Iani bidingo West Garo Hills a·jani Deputy Commissioner-na sedoatengon, Meghalaya a·dok gimikon COVID-19-ni giproroaniko champengna rakgipa niamrangko ra·gate manderangni re·ruraanirangko champengengon, ia AMPT rama ro·ong salruragipa truck garirangni re·ruraanirangkode maming champenga dongjaenga ine GSU Raksamgre unit parakatenba, ia rama gita ro·ong salruraenggipa garirangkoba champengchina dabiangaha.
Ia rama gita ro·ong salruragipa truck garirangni re·ruraanirangara jolo songdongenggipa manderangna COVID-ko batrikrikatani cholrang dongan baksana ia rama gita ja·arangchi re·ruraenggipa manderangnaba kenchakaniko aro ramana nosto ong·anikoba ra·baani ong·enga ine GSU Raksamgre unit-ni dilgiparang parakataha.
“Ia rama gita ro·ong salruraenggipa garirang traffic-ni niamrangkoba ja·rikrongbreja aro ramarango skatang sale jeoba park ka·e donrongaia. Walni somoirangoba ia truck garirang LED light-rangkosa nate salengani gimin gipinrangnade namen neng·nikanirangko ra·baronga. Iana agreba ia AMPT rama indinan nosto ong·gimin ong·e da·o ia ro·ong salgiparang garirangni re·ruraani a·sel namjabatroroengaha,” ine GSU Raksamgre unit parakataha.