SHILLONG: Re·anggipa Robibar saloni Sombar salona konta 24-ni gisepo Meghalaya a·dok gimiko sak 187-san COVID-19-ko man·dapaiaha aro uandaken a·doko COVID man·ani rang·san komiangaha ine nikna man·aha. Salsani gisepo sak 187-san COVID man·dapaiahaoba ia apsan somoion sak 11 manderang a·dokni dingtang dingtang biaprango COVID man·e siangtaiskaaha aro ian a·doko COVID man·e sianirang komijaenga ine mesokaniba ong·skaaha.
Konta 24-ni gisepo COVID-19 man·dapgipa sak 187 manderangko channe da·o Meghalaya a·dok gimiko COVID-19 man·e dongenggiparang gimik sak 4734 gapaha aro ia apsan salon mande sak 11 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1174 gapskaengaha.
Konta 24-ni gisepo COVID man·gipa sak 187 manderangoni sak 2-de East Garo Hills-o, sak 3-de East Jaintia Hills-o, sak 95-de East Khasi Hills-o, sak 2-de North Garo Hills-o, sak 13-de Ri Bhoi a·jao, sak 3-de South West Garo Hills-o, sak 1-de South West Khasi Hills-o, sak 21-de West Garo Hills-o, sak 19-de West Khasi Hills-o aro sak 28-de West Jaintia Hills a·jao ong·a.
Salsani gisepo COVID man·e sianggipa sak 11 manderangoni sak 5-de East Khasi Hills-o, sak 2-de Ri Bhoi a·jao, sak 1-de South Garo Hills-o, sak 2-de West Khasi Hills aro sak 1-de East Jaintia Hills a·jao ong·a.
Ia apsan salon gimik sak 479 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 63,450 gapskaengaha.
