SHILLONG: Mongolbar salni 1:30 bajimango, Shillong songjinmani Laitumkhrah bazar-o boma gopretaha aro ia boma gopretanio me·chik saksako man·chape gimik sakgni manderang saknaanirangko man·aha.
Mikrontangchi nikgipa manderangni aganani gitade, Mongolbar salo manderangni bazar cha·chichatokengmiting somoio rang·san ia boma gopretaha aro boma gopretanichi gopretchakgipa biap baksana samba jolo donggipa nokrangba adita nosto ong·atako man·aha.
Boma gopretani ja·man bakan police-rang ua biapona re·ange, gopretchakgipa biapko chipe donataha aro boma gopretani bidingo talbate ma·sina am·sandianirangko dakna a·bachengaha.
Boma gopretani ja·mano jolni MLA Ampareen Lyngdoh-ba bakan ua biapona re·ange, ia a·selni bidingo sing·sandie ra·eaha aro boma gopretanio jak donggipa manderangni kosako raken jegalataha.
“Ia sal somoirango sajinmani a·sel manderang neng·bee janggi tangna gita nangtokengon, iandake saljrakjrako manderangni kam ka·chakgipa biapo bomarangko gopretataniara ka·pongni kamko mesoka. Ia kamko anga raken jegalenga aro boma gopretanio jak donggipa manderangko rim·e nanga gita sastirangko on·china anga police-rangko didienga,” ine a·sel ong·chakgipa biapko nieani ja·man Lyngdoh aganaha.
Koborko on·ani gitade, ia boma gopretanio saknaa man·gipa me·chik saksade sambao cha dokkan dakenggipa ong·achim aro ua somoio ua an·tangni abitang baksa cha dokkanko rongtalatengachim.
Indake ong·engon, ia biapo boma gopretaniko Hynniewtrep National Liberation Council (HNLC) bobil dol a·kangataha.
Re·anggipa July jaoba East Jaintia Hills a·jani Khliehriat police reserve-o IED boma gopretahachim aro ua somoioba boma gopretaniko HNLC bobil dol a·kangahachim.
HNLC dolni manderangko police-rang ka·saninggija dake kal·ake roenba so·ote galahani gimin a·jak sokskana gita IED bomako gopretataha ine HNLC dol a·kangahachim.
Batanggimin bilsirangonin sorkari baksa agangrike tom·tomaniona re·bapilna nangnikenga ine HNLC dol parakatahaoba, sorkari ia bobil dol baksa agangrikaniko daka dongkujaenga.
Sorkari baksa agangrikaniona re·bana skangde HNLC, so·sojengjeng ong·atani kamrangko watgalchengna nanggen ine sorkari aganskaengachim.
