TURA: Meghalaya a·dokni skul aro college-rangko kulipiltaiani bidingo bakan sorkari chanchianggen ine a·dokni Deputy Chief Minister aro Health Minister Prestone Tynsong parakataha.
Tynsong-ni parakatani gitade, a·doko skul, college aro university-rangko kulipiltaina gita niamrangko tarie on·china gita sorkari, Education department-na ge·etaniko on·manaha.
“A·doko skul, college aro university-rangko kulipiltaina gita chinga bakan tom·e chanchianggen aro iana Education department, niamrangko tarie on·chengna nanggen,” ine Deputy Chief Minister parakataha.
Ia sal somoirango COVID-19-ni giproroaniko champengna gita skul aro college-rangko chipe dontokna nangengon, class-rangko internet gitasa ra·skaengachim ine nikna man·a. Indake ong·genchimoba, a·dokni bang·bata biaprangon aro mongsongbate songadam nokadamrango internet-rangko name man·jani a·sel bang·bata chatro chatrirangan class-rangko ra·na man·skatokjaengachim.
Iandake internet gita class-rangko ra·anio bang·a chatro chatrirangan class-rangko ra·na man·jaengani gimin aro porikkarangkoba sena man·jaengani gimin skul aro college-rangko kulipilchina gita dingtang dingtang dolrang dabitokskaengahachim.