SHILLONG: Re·anggipa Mongolbar saloni Budbar salona konta 24-ni gisepon Meghalaya a·dok gimiko sak 10 manderang COVID-19 man·e siangtaiaha aro ia salo sianggipa sak 10 manderangoni sakskude tika su·kugijagiparang ong·achim ine health official-rang parakataha.
Ia konta 24-ni gisepo Meghalaya a·dok gimiko sak 463 manderang COVID-19 man·dapaha aro ia sak 463 manderangko channe da·o Meghalaya a·dok gimiko COVID-19 man·e dongenggiparang gimik sak 4496 gapengaha aro ia apsan salon mande sak 10 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1195 gapskaengaha.
Konta 24-ni gisepo COVID man·gipa sak 463 manderangoni sak 2-de East Garo Hills-o, sak 13-de East Jaintia Hills-o, sak 255-de East Khasi Hills-o, sak 3-de North Garo Hills-o, sak 28-de Ri Bhoi a·jao, sak 7-de South Garo Hills-o, sak 7-de South West Garo Hills-o, sak 16-de South West Khasi Hills-o, sak 40-de West Garo Hills-o, sak 67-de West Khasi Hills-o aro sak 25-de West Jaintia Hills a·jao ong·a.
Salsani gisepo COVID man·e sianggipa sak 10 manderangoni sak 7-de East Khasi Hills-o, sak 1-de West Jaintia Hills-o aro sak 2-de West Khasi Hills a·jao ong·a.
Ia apsan salon gimik sak 384 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 64,541 gapskaengaha.