TURA: West Garo Hills a·jaoba dingtang dingtang college aro higher secondary skulrango admission-ko ra·tokengahani gimin chatro chatrirangni namgnina, COVID-19-ko warachakna gita sorkarini dongimin niamrango pangchake mande salruragipa garirang, jekai bus, sumo aro uandakgipa garirangko Sombar saloni Sukrobar salona salrurapiltaina gita West Garo Hills District administration on·engaha.
West Garo Hills a·jani Deputy Commissioner Ram Singh-ni u·iatani gitade, skul aro college-rango admission-ko ra·tokengahani gimin chatro chatrirang altuae re·rurana man·na gita bus, sumo aro uandakgipa garirangko re·rurana on·piltaiengaha.
Garirangko salruraengon, garini driver, handyman ba uandake gario kam ka·gipa manderang tika su·ama su·kuja, uni bidingo see gari mikkango tapchina gitaba Deputy Commissioner u·iataha.
