TURA: Dalu gita Bangladesh a·songona ro·ongrangko salruraengani a·sel South West Garo Hills a·ja gita dakanggipa NH-51 rama ta·raken nosto ong·atako man·engaha ine Mahendraganj jolo songdongenggipa manderang, ma·mong sorkarina badi ka·doangaha.
Iani bidingo ma·mong sorkarini, Union Road Transport & Highways Minister Nitin Gadkari-na badi ka·doangengon, Mahendraganj gita Dalu-ona dakanggipa ramako 2020 bilsio matchotaonin Mahendraganj Export Association, ro·ongrangko nangana bate truck garirango Bangladesh a·songona salruraengani a·selan ia rama da·o obosta namangjaengaha ine Mahendraganj jolni manderang parakataha.
Ia rama gita ro·ongrangko nangana bate salruraengani a·sel ramarang nosto ong·atako man·an baksana ia ramarango donggipa songni manderangnaba kenchakna nangani ong·enga maina batanggimin somoirango ia truck garirangni a·selan ia ramarango bang·en obosta ong·anirangko nikna aro knasona man·aha ineba jolni manderang parakataha.
Ia ramarango truck garirangni ro·ong gate salruraaniko nirokna gita weighbridge damsaba dongja ine janapatengon, ia rama gita ro·ong salruraaniko champengna ta·raken ja·kuko de·china jolni manderang, ma·mong sorkariko didiataha.
