SHILLONG: Hynniewtrep National Liberation Council (HNLC)-ni gitcham general secretary Cheristerfield Thangkiew-ko so·otani gimin dingtang dingtang dolrang police-rangko matnangtokengon, adita salrangna skang Shillong-ni Laitumkhrah-o aro East Jaintia Hills a·jani Khliehriat-o IED bomako gopretanio jak donga ine sakkiko man·ahani giminsa police-rang uni nokko chadrapeaha ine Sukrobar salo a·dokni Director General of Police (DGP) R Chandranathan a·kangatskaaha.
DGP-ni parakatani gitade, HNLC-ni gitcham general secretary Cheristerfield Thangkhiew-ko rim·na gita police-rang uni nokko chadrapeon, ua churichi police-rangni saksako chadrapna jotton ka·skaaha aro uandaken ua police an·tangko jokatna gita uko silchidarechi goskana nangaha.
“Uko goani ja·man bakan police-rang Shillong civil hospital-ona ra·angahachim indiba saknaanirangko man·e ua siangna nangaha,” ine DGP parakataha.
Cheristerfield-ko goani ja·man, sing·sandianirangko dakna gita police-rang uni depante baksana mande saksako rim·baaha aro uni nokoniko pistol ge·sa baksana laptop aro gipin bosturangkoba rim·e ra·baaha ineba DGP parakataha.
“Adita salrangna skang, Laitumkhrah-o aro East Jaintia Hills a·jani Khliehriat-o IED bomako gopretanio ua jak donga ine chinga chu·gimik sakkirangko man·ahani giminsa uni nokko chadrapeaha,” ine DGP parakataha.
Mikkangchiba HNLC bobil dolni kamrangko champengna gita police-rang rake kamrangko ka·angkugen ineba Chandranathan parakataha.
