Tura: Tura Municipal Board-ni jabol galchakram Rongkhon Songgital-ko rongtalatna a·bachengataha. Garo Students Union (GSU) CEC Tura, Rongkhon Songgital Youth Environment Committee, Cemetery Committee aro jolni saksa sakgni dilgiparang Urban Affairs Department baksa bakrime jabol galchakram biapona re·ange nirokeaha. Aro ta·rake kamko ka·na ku·rachakaha.
Urban Affairs department, gopram sepangggipa ramako rongtalatna a·bachengataha.
Uandake jolni manderangba biaprangko mesokate on·e dakchapaenga. GSU-ni public secretary Chegan N Marak indine aganaha, “gopram ong·ani gimin simsake kam ka·na gita nanggen.”
Gital jabol galchakram biapko name dake rike on·china gita authority-na jadok somoiko on·aha. Jabol galani a·sel jolni manderang bilongen neng·nikako man·enga. Christian gopramona aro Ringre chiringona jabol gala sokani gimin manderang changni chang badi ka·aha ineba Marak agandapaha.
Nirokeani ja·man authority, jabol gimikko rongtalatna aro pakmako rike on·na gita ku·rachakaha. Indiba bon·kamaode jabolara apsan biapona sokangtaigen, ian dal·bea neng·nikani ong·enga, uni gimin ta·raken biap gitalko nangenga, ine Marak aganaha.
Manderang jelbatroroani a·sel jabol galaniba bataha. Jabol galchakram biaparan namen chonbea. Jabolko rongtalata matchote wall ba pakmako rikna a·bachengna nangskagnok. Jabol galchakram biaponi sengdogipa balwa manderangna bimangna kenbegnigipa ong·a. Minggipin manderangni simsakgija jabol galanichi gopramona jabolrang tang·angaha. Unbaksana septic tank-ba kam ka·ja, ine janapatenba Marak, jinma manderangko dikdiksa somoina chiko jakkalkujachina mol·molataha. “State Pollution Control Board, re·bae chiko porikka ra·e nichina maina bang·arangan chiko jakkalenga, ine Marak agandapaha.
