SHILLONG: PDS-ni merongko bikote cha·enggipa manderangna suale on·na gita salangenggipa trak driver-ko so·otenba quintal 500 merong baksa gariko sale katgipa mandeko police, Sombaro West Jaintia Hills district-o rim·aha ine police koborna u·iataha.
Rim·a man·gipa mande aro uni ripeng, Ummulong-o donggipa Food Corporation of India (FCI) godown mikkango gariko neng·takatenba trak driver gari ning·o tusiengachim, unomitingo uko chadrapenba so·otaha aro merong gatgipa garikoba sale katangahachim. So·otako man·gipa trak driver, Assamoni ong·achim ine Superintendent of Police Bikram D Marak aganaha.
Dosi dakgipa manderang, jemangan Silchar-china salangengachim, uamangni gariko damsa weighbridge-o nikeaha, jeon uamangoniko saksako rim·a man·eaha aro saksa kate jokaha, SP aganaha. Sing·sandianiko dakani ja·mano, uamangni so·ote galgipa biap Riatturiem-ona police-ko rimangenba manggisiko mesokaha.
SP-ni aganani gitade, trak driver-ko so·otgipa mande, skangoni namgijako dakronggipa ong·achim, jean skang 2016-oba trak garioniko cha·una jotton ka·ani gimin rim·ako man·ahachim. Kate jokgipa saksakoba rim·na gita sandienga, SP agandapaha.
