SHILLONG: Shillong songjinmao so·sojengjeng ong·anirang da·o adita nambapilengahani gimin curfew-ko Budbar pring 6:00 bajioni attam 4:00 bajiona dontongatchengna gita sorkari tik ka·angaha.
Shillong songjinmao ong·enggipa obostarangko nipilna gita Mongolbar salo a·dok sorkari tom·e chanchirimangenba, obostarang da·o adita namkalengahani gimin manderangni namgnina curfew-ko Budbar pring 6:00 bajioni attam 4:00 bajiona dontongatna tik ka·angaha ine a·dokni Chief Minister Conrad K Sangma, kobor ra·timgiparangna parakataha.
Curfew-ko dontongatani bidingo East Khasi Hills a·jani Deputy Commissioner, manderangna talbate u·iatgen ineba a·dokni Chief Minister parakataha.
Shillong songjinmao da·o obostarang namkalna a·bachengengaha ine talatangengon, tom·tomaniko ra·bapilna gita sorkari baksa bakrime kamko ka·china dingtang dingtang gittimni dilgiparangko, toromni dilgiparangko, ja·delgimin manderangko aro dingtang dingtang dolrangkoba Chief Minister didiataha.
“Shillong-o tom·tomaniko ra·bapilna gita chinga rake kamko ka·enga aro iana chinga dingtangmancha peace committee-koba songmanaha aro ia committee Budbar salo, Deputy Chief Minister-ni dilanichi tom·e chanchirimanggen,” ine Sangma aganaha.
Chief Minister-ni parakatani gitade, mobile internet-koba sorkari, Budbar attam 6:00 bajiona bon ka·angkugen.
Shillong songjinmao so·sojengjeng ong·angani ja·man curfew-ko ra·gatangan baksana mobile internet-rangkoba bon ka·e donatahani a·sel manderang neng·nikanirangko chagrongna nangtokengahachim ine nikna man·a.
Indake ong·engon, manderang an·tangtangna nangchongmotgipa cha·ani bosturangko bree ra·rikna man·na gita Mongolbar attamo dikdiksana mirong aro uandakgipa bosturangko palgipa dokkanrangkoba kuliataha aro dokkanrangko kulia bakan bang·bea manderang, an·tangtangni nangchongmota bosturangko brena dokkanrango tom·chimongtokaha.