TURA: Drae til·eka man·gipa me·chik bi·sako drae bi·sa galatanina rim·ako man·gipa Tura-ni doctor-na Budbar salo South Garo Hills a·jani kachari, jaminko on·na jechakangaha. Rim·ako man·chengaoni ua gnigipa changna jaminna dorgastoko galahachim indiba uni jaminna dorgasto galaniko kachari, jegalattaiaha.
Gumetanggipani jako drae til·ekako man·gipa me·chik bi·sako drae bi·sa galatani gimin Tura Reserve Gittim-ni Dr Dolon R Marak-ko antisamangna skangsan, South Garo Hills a·jani police-rang, Williamnagar-oniko rim·ahachim.
Drae bi·sa galatako man·gipa me·chik bi·sara South Garo Hills a·jaoni ong·achim aro bi·sa galatani ja·man ua an·chi ong·ruruahani gimin uko Baghmara hospital-o done sannaniko on·ahachim.
Ia bi·sako drae bi·sa galatani ja·man South Garo Hills a·jani police-rang, ia me·chik bi·sako drae til·ekgipa uni gumetang aro ia me·chik bi·sako drae bi·sa galatgipa doctor-ko Williamnagar-oniko rim·aha.
Koborko on·ani gitade, ia doctor Williamnagar civil hospital-ni Tura-ona kam transfer ong·baani ja·manoba Williamnagar-on iandake niam gri kamrangko ka·kuengachim.
Indake ong·engon, police-rangni rim·ani somoio ia doctor, East Garo Hills a·jao kam ong·jahachim aro uko June jaon Tura-ona transfer ka·atahachim ine Williamnagar Civil Hospital-ni official-rangba talataniko on·angaha.
Ia doctor-ni bidingo talataniko on·angengon, Dr Dolan-ko kam ra·doate June jaon West Garo Hills a·jani Tura-o donggipa Maternity & Child Hospital-ona ra·jitatahachim ine Williamnagar Civil Hospital-ni Superintendent Dr R Debnath parakataha.
“Ua an·tangni gital kamko jako ra·na man·na gita June jaon uko East Garo Hills a·jaoniko watataha,” ine Dr Debnath parakataha.
Indake ong·engon, rim·ako man·gipa doctor da·o chu watna nangani a·sel dingtang dingtang saanirangko man·engani gimin uko sanna gita Baghmara Civil Hospital-o donataha ine kobor on·aha.
