SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otani bidingo jakgitele am·sandianirangko dakchina dabitokengani gimin kakketko am·sandianirang matchotkujaskal mamingkoba skatang aganjachina Opposition dolni dilgipa Mukul Sangma, a·dokni Chief Minister Conrad Sangma-ko aganaha.
Sangma-ni aganani gitade, inquiry-ko dakengmiting somoion chief minister, police-rangna chake ba aganna nanggijagipa kattarangko agangenchimode inquiry-ko dakanio jakgitel ong·na man·jawa.
HNLC-ni gitcham dilgipako police-rangni so·ote galani ja·man Shillong songjinmani manderang, ia a·selni bidingo tale ma·sina man·na gita National Human Rights Commission (NHRC)-chi inquiry-ko dakchina dabitokengachim ine nikna man·a.
Ia a·selni bidingo kakketko am·sandina gita Human Rights Commission-na pakwate on·china dabitokengon, a·dok sorkari ia a·sel bidingo judicial inquiry-ko dakchina ge·etangenba, inquiry-ko dilna gita MHRC-ni chairman-ko seokskaahachim.
Indake ong·engon, ia a·selni bidingo jakgitele am·sandianirangko dakchinasa dabiengani gimin, inquiry-ko dakengmiting somoion aganna nanggija kattarangko agangenchimode ia a·selni bidingo kakketko ong·katatna man·jawa ine Congress dolni dilgipa, Chief Minister-ko matnangataha.
“Ua (CM) da·on police-rangna chake aganna a·bachengengaha. Ia a·selni bidingo jakgitelgipa inquiry-kosa dakatenga ong·ode ua da·o dipet mamingkoba agankuna nangjachim aro inquiry matchotna on·chengnasa nangengachim,” ine Sangma aganaha.
Mukul-ni aganani gitade, chief minister-ni agangipa kattarangara police-rang ong·akon dakaha inesa aganna jotton ka·ani gita ong·enga aro ua inquiry matchotna skangan, kamko matchotata gita ong·engachim.
MHRC-ni chairman-ko inquiry dakdilna seokani gimin janapatengon, sorkari u·iataniko on·jagenchimoba niamon MHRC-de ia a·selko jako ra·na nangao ga·aka aro iandakesa MHRC-de kamko ka·a ine Sangma talatangaha.
“MHRC-de an·tangni kamko ka·na nangako ka·aigen maina ian MHRC-ni kam ong·a. Na·simang namnikengbo namnikjaengbo uamangde an·tangni kamko ka·aigen,” ine Opposition Congress dolni dilgipa aganaha.
