SHILLONG: Meghalaya a·doko dingtang dingtang kal·susaanirangko re·baenggipa anti dipet on·piltaina a·dok sorkari tik ka·angaha.
Bristibar salo a·dok sorkari, COVID-ni obostarangko nipilangenba, mikkang anti dipetde a·doko dingtang dingtang kal·susaanirangko on·piltaina tik ka·angaha.
Cinema hall-rangko kulipiltaiani gimin chanchiangengon, cinema hall-rangko re·baenggipa Sombar sal dipet kulina on·piltaignok indiba cinema hall-o bakgittamoni baksana bate manderang napna man·jawa ine sorkari tik ka·e donangaha.
Lady Hydari Park, Wards Lake, Elephant Falls aro uandakgipa manderangni rochakgipa biaprangkoba Sombar sal dipet kuliatpiltaina sorkari tik ka·angaha.
Kal·susaanirangko, cinema hall-rangko aro manderangni rochakgipa biaprangko kulipiltaina on·genchimoba dongimin niamrango pangchakesa kulina man·gen ine sorkari tik ka·angaha.
A·dokni Deputy Chief Minister Prestone Tynsong-ni u·iatani gitade, ia SOP ba niamrangara bilsi 18 batgimin manderang, jemangan tik su·giminrang ong·achim uamangnasan ong·aigen.
Sombaroni dipete a·doko private transport-ko-ba 1/3 mande gate salna on·na gita Sorkari chanchiaha.
School aro college-rangko kuliani bidingo aganengon, iani bidingo Sorkari mikkang antio chanchirimanggen ine Pa Tynsong aganaha.
A·doko COVID tikka su·giparang da·o 49 percent ong·engjok, aro ia bilsi September jaode 70 percent gapegen ine ka·dongenga, Pa Tynsong aganaha.
Indake ong·engon, A·doko COVID tikka su·giparang 85-90 percent ong·jokode, champenganirangko chu·gimikkon ra·galatna gita Sorkari chanchie donenga. ‘‘Ong·rongbewal janggi tanganiona ra·bapilna gita chinga kamrangko ka·enga” ine Deputy CM aganaha.
