TURA: North Garo Hills a·jaoba COVID-19 giproroengkuani gimin sabisini giproroaniko champengna gita North Garo Hills a·jani District Magistrate RP Marak, dingtang dingtang niamrangko ra·gate on·angtaiaha.
Deputy Commissioner-ni u·iatani gitade, gital u·iataniko on·taikujaskal North Garo Hills a·jani ning·o donggipa skul aro college-rangko chipe donangkugen.
Walni curfew-ko walantian attam 6:00 bajioni pring 5:00 bajiona ra·gatangkugen indiba ian sipai dolrangna, medical-ni manderangna aro nangchongmotgipa bosturangko salbaenggipa garirangnade maming nangchakeani dongjawa ine DC u·iataha.
Dokkanrangko kuliani bidingo u·iataniko on·angengon, dokkanrangko Sombar saloni Sukrobar salona pring 8:00 bajioni attam 4:00 bajiona kulina man·gen indiba soninggipa bosturang, jekai me·su samjak, be·en bitin aro uandakgipa bosturangkode attam 5:00 bajiona kulina man·gen ine North Garo Hills a·jani District Magistrate parakataha.
Dokkanrangko kuliengon, dokkan nokgipa aro dokkano donggipa manderang tika su·ama su·kuja uko manderangni namgnina, dokkanni a·palo see donchina Deputy Commissioner u·iataha.
Mande sianirangode Deputy Commissioner-oniko permission ra·chengenba sak 20-na batgija manderang tom·chimongna man·gen indiba da·o dipet gipin jinma tom·anirangkode ong·atna man·kujawa ine DC u·iataha.
Mande salruragipa garirang 50 percent-na bate mande gatna man·kujawa aro garirangoba gariko saltimgipa ato gipin kam ka·giparang tikako su·ama su·kuja uko gari mikkang see tapchina DC u·iataha.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.