TURA: Manderang olakkianirango bakko ra·piltaina man·na gita West Garo Hills a·jaoba sorkarini dongimin niamrango pangchake pilak olakkiram nokrangkon Sonibar aro Robibar salrango pring 9:00 bajioni attam 3:00 bajiona kulipilna gita District Magistrate Ram Singh, u·iataniko on·angaha.
Olakkiram nokrango olakkianirangko dakengon, mask-rangko gantokna nanggen, olakkiram nokrango jak rongtalani sam ba chi aro sabonko donna nanggen, saksa sakgipinoni chel·tanggrikaniko rakkina nanggen aro olakkiram nokrango skatang stuna man·jawa ine Deputy Commissioner u·iataha.
Olakkiram nokrango manderangni tom·ani bakgittamoni baksana batna nangjawa, olakkiram nokrango bia ka·anio sak 50-na bate manderang tom·na man·jawa, olakkiram nokni a·palrango bia ka·anirango sak 20-na batna man·jawa aro bia ka·anirangoba ale cha·anirangko dakna man·kujawa ineba Deputy Commissioner u·iatenba, biarangko ka·na skang, bia ka·ani tarik, somoi aro biapni bidingo District Magistrate-oniko permission ra·chengna nanggen ine parakataha.
Bilsi 18-na komikuenggipa, bilsi 65 batgipa, saanirang donggipa manderang aro an·o donggipa me·chikrangkode man·a dipet noktangtangon dongchina gita DC u·iataha aro pilakkon tika su·e ra·china gitaba ua didiataha.