Shillong: (PTI) Meghalaya-ni adita sak minister aro MLA-rang, bobil doloniko tangka dabie lekka watanirangko man·enga, ine a·dokni Deputy Chief Minister Prestone Tynsong, Sonibar salo aganaha.
A·dokni bang·a politician-rang mobile phone-o tangka dabie message watako man·engani gimin a·dok police, am·sandianiko a·bachengataha, ine senior office aganaha.
Batanggimin August jani 13 tariko Hynniewtrep National Liberation Council (HNLC)-ni gitcham general secretary Cheristerfield Thangkhiew-ko encounter-o so·ote galani ja·man Shillong-ni Mawlai aro Jaiaw jolrango golmal ong·aha. Ua somoinin bobil dolrangoniko tangka dabiani lekkarangko man·soenga.
“A·dokni minister aro MLA-rang tangka dabiani lekkarangko man·enga ine chinga u·ienba sandianiko a·bachengataha” ine Tynsong aganaha.
Indake ong·engon police-rang WhatsApp, SMS gita notice man·sogiparangni chelchak-naljokaniko nigriken police-rang am·sandienga.
Political dilgiparangsan ong·aija bang·a businessmen-rangba mobile phone gita tangka dabianiko man·enga ineba police officer aganaha.
“Income tax-ni bimingo lak 10 ba una bate tangka dabiako man·enga. Bang·a politician aro businessmen-rangko HNLC-na income tax gita tangkako gamchina ge·etaha.”
Uandake Chief Minister Conrad Sangma-ba Sukrobar salo a·dokni Minister aro MLA-rang, bobil dol HNLC-oniko tangka dabianiko man·enga ine ku·rachakaha.
“Badita sak Minister aro MLA-rang indakgipa obostako chagrongaha, iani gimin talede agana man·ja indiba ian kakket ong·a, uni gimin am·sandianiko a·bachengataha, ine chief minister aganaha.
