SHILLONG: Budbar attamo, ‘Ka Sur U Nong Mawlai’ ba Mawlai-o songdongenggiparangni ku·rang dolni manderang, Meghalaya a·dokni Chief Minister Conrad K Sangma, Deputy Chief Minister Prestone Tynsong, Home Minister Lahkmen Rymbui, DGP R Chandranathan, East Jaintia Hills-ni SP Jagpal Dhanoa aro SP (Traffic) Shailendra Bamaniya-ni bimangko tarienba, Mawlai petrol pump sambao jinma so·e galaha.
Re·anggipa August-ni 13 tariko Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·ote galanio jak donggipa police official-rangko salsnini gisepon kam dontongatchina gita Mawlai jolni dingtang dingtang dolrang dabitokahaoba, ia police official-rangko kamoniko ra·galkujaengani gimin Budbar attamo dilgiparangni bimangko tarie jinma so·e galskaaha.
Cheristerfield Thangkhiew-ko so·otgalanio jak donggipa police officer-rangko kam dontongatchina salsni somoi on·ani Budbar salon bon·ahachim indiba ia salona kingking sorkari maming ja·kurangko de·jahani gimin Mawlai jolo donggipa dingtang dingtang dolrang, sorkarini kosako jegalanirangko dakangtokaha mikkangchiba apsan daken jingjengatanirangko dakangkuna tik ka·e donangaha.
A·dokni DGP baksana police officer sakgniko kam dontongatchina dabie ia dolrang, Sukrobar attamo, ‘candle light vigil’-koba ong·atanggen ine u·iataha.
HNLC-ni gitcham dilgipako so·otani bidingo sorkari, judicial inquiry-ko dakna ge·etmanahani gimin maming ja·kurangko de·na skangba ia inquiry-ni report-ko sengchengna nanggen ine adita salrangna skangsan a·dokni Chief Minister Conrad Sangma parakatskaahachim.