TURA: Garo Hills-ni bol wa·arangko skatang den·e gipin biaprangona palsrukanirang batroroengani gimin adita salrangna skang, Selsella jolo donggipa Bolbokgre Chadambe Dol (BCD) aro Garoland State Movement Committee (GSMC)-ni dilgiparang, Garo Hills Autonomous District Council (GHADC)-ni Executive Membor (EM) Forest I/c Arbinstone B Marak-ko grongenba, Garo Hills-ni bol wa·arangko nambate nirokchina gita didiangaha.
Iani bidingo GHADC-ni Executive Membor-na sedoatengon, Garo Hills-ni bol wa·arangko skatang den·e galengani a·selan Garo Hills-ni buring bolgrimrang porongrong ong·roroangengaha aro iandake bol den·e palsrukaniko da·onin champengjagenchimode mikkangchi namjaba obostaona sokanggnok ine BCD aro GSMC-ni dilgiparang parakataha.
“Bol wa·arangan mandena rang·sitani balwarangko on·gipa ong·a ine chinga chononin poraimanaha, uni gimin Garo Hills-o songdongenggipa manderangni namgnina ia bol wa·arangko ripinge rakkina aro bolrangko ge·dapna gita ja·kurangko de·china chinga Garo Hills-o songdongenggipa manderangko didienga,” ine BCD aro GSMC-ni dilgiparang parakataha.
Meghalaya Forest Act aro Indian Forest Act-ko bilakbate ra·gatangchina gitaba ia dolgni NGO-rang, GHADC aro a·dokni Forest department-ko didiangaha.
“Garo Hills-ni bol wa·arangko ripinge rakkiani pal, mitam manderang an·tangtangni man·gninamangmang chanchie Bangladesh, Assam aro uandake gipin biapni manderangna pale cha·skaenga,” ine BCD aro GSMC-ni dilgiparang parakataha.
Niam gri bol rate palsrukenggipa aro gipin biaprangoni re·bae bol wa·arangko niam gri ra·angenggipa manderangni kosako rakbatgipa ja·kurangko de·china gitaba dolgni NGO-rang, GHADC aro a·dok sorkariko didiataha.