TURA: 2020 bilsini December jao government upper primary (UP) skulni skigipana interview ong·atani result-ko da·onan parakkujaenga ine Garo Students Union (GSU) Western Zone (North) Dadenggre parakatenba, skigiparangni namgnina ia interview-ni result-ko ta·raken parakchina gita a·dokni Chief Minister Conrad K Sangma-ko didiataha.
GSU Western Zone (North) Dadenggre-ni u·iatani gitade, ia personal interview-ko 2019 bilsio Meghalaya Teacher Eligibility Test (MTET) pass ka·gipa skigiparangna ong·atahachim aro ia interview-ni result-ko gipin district aro sub-division-rangode parakenba kamo ra·pilahaoba Dadenggre-nade ia interview-ni result-ko da·onan parakskakujaengachim.
“Uni gimin skulrango poraienggipa aro skigiparangni namgnina ta·raken ia interview-ni result-ko Dadenggre-naba parakchina chinga mol·molenga,” ine GSU Western Zone (North) Dadenggre-ni president Tengsan M Marak parakataha.
Dadenggre-o Science, Commerce aro Arts stream-ni degree college-ko kulichina aro Dadenggre Puri Government Higher Secondary School-ko Science aro Commerce stream-ona ra·doatchina gitaba GSU, a·dokni Chief Minister-ko didiataha.
Bon·kamao, Dadenggre-ni rama jal·lang, mobile network aro bijolirangko namdapatchina gitaba GSU Western Zone (North) Dadenggre, a·dokni Chief Minister Conrad Sangma-ko didiataha.
