TURA: Garo Hills Autonomous District Council (GHADC)-o National People’s Party (NPP)-chi dilenggipa gital Executive Committee-ni skanggipa budget session-ko re·baenggipa September 6 tarikoni a·bachenggen. Ia budget session-ko jasa skangan ong·atani ong·ahachim indiba ua somoio GHADC-ni chief executive membor aro chairman sakgnian COVID-19 man·ani a·sel ia session-ko dontongatchengna nangahachim.
GHADC-ni Chairman Rakesh A Sangma-ni parakatani gitade, GHADC-ni Budget Session-ko September 6 tarikoni a·bachenge September 8 tariko matchotatgen.
“GHADC-ni gnigipa session-ko re·baenggipa September 6 tarik pring 11:00 bajioni District Council Session Hall-o a·bachenggen aro ia session-ko September 6 tarikoni 8 tarikona ong·atanggen,” ine Sombar attamchibara, GHADC-ni Chairman parakataha.
GHADC-ni skanggipa session-ko jagnina skangan ong·ate gital seoka man·gipa membor-rangko ku·mikchetatahachim indiba uni ja·man Garo Hills-o rang·san COVID giproroanichi gnigipa session-ko ong·atchipna man·kujaengachim.
GHADC-ni CEM aro Chairman sakgnian COVID positive ong·ahani gimin ia budget session-ko ong·atna salsa skangsan noktangtango nape dongna draatako man·ahachim.
Indake ong·engon, da·o GHADC-ni budget session-ko September 6 tarikoni ong·atna tik ka·manahani gimin GHADC-o opposition dol ong·e kamko ka·enggipa Congress dolba, GHADC-o tangka paisani gita jakkalsretani aro dingtang dingtang kam ka·sretanirangko sing·dona gita tarisamsotokskaengaha.
