SHILLONG: Lawmali Pyllun-o donggipa Pasteur Institute-ko Covid Care Centre dake taridapani mikkang October jani bon·angachibara matchotnaba gnang indiba Tura-ode wachini a·sel ia apsan dakgipa centre-ko tariani ru·utkunaba gnang ine kobor on·timgiparang u·iataha.
Sombar salo official-rangni u·iatani gitade, ia project-ko jako ra·e ka·enggipa Chennai-oni Modulus Housing company, uamangni kamko September 10 tarikni gisepon matchotna man·gen ine u·iatahachim. Indake ong·genchimoba Health department-ni Engineering Wing, pipeline-rangko tariani aro entry point-ko tarianio somoirangko nangskakuenga ine official-rang parakataha.
Ia Covid care centre-na MeECL-ni gitaba bijoliko sringna aro PHE department-ni gitaba chirangko sale on·kuna nangenga ine official-rang parakataha.
“Ia pilakko nigope chu·gimik kamrangko October jani bon·angchibara matchotna chinga ka·dongenga,” ine official-rang aganaha.
Ia Corona centre-na sewage septic tank-koba tarina nangkuenga ine janapatengon, chi moilarangkode uamang Ganesh Das Hospital-ni treatment plant-o watna miksongenga ine official-rang parakataha.
Indake ong·engon, da·o mikkarang wakuengani gimin Tura-o rikenggipa Covid care centre-ko matchotatna gitade somoirangko nangkunaba gnang ine official-rang parakataha.
“Mikkarang namkalangahaon chinga kamrangko ta·rakbatatgnok indiba pangchakanirangko songani ja·manosa ia centre-o nangchongmotgipa kamrangkode a·bachengna man·gen,” ine official-rang aganaha.
Shillong aro Tura-ni pre fabricated Covid centre-rangna sorkari gong kror 7 tangkarangko chame donmanahachim
