TURA: Constitution-ni Sixth Schedule-ko taridapna sienggipao ma·mong sorkarini ‘unrepresented tribes’ ingipa kattako ra·chapna miksonganirang dongani gimin ia ‘unrepresented tribes’ ingipa kattako ra·chapgenchimode mikkangchi Garo Hills-o songdongenggipa Tribal jatrangni gisepo ma·sisretgrikanirang donggen ineba Garo Hills-o dingtang dingtang dolrangni nangrime bikotgipa All Garo Hills Joint Action Committee (AGHJAC)-ni dilgiparang, a·dokni Chief Minister Conrad K Sangma-ko Meghalaya Secretariat-o grongenba, iani bidingo ku·rangko on·china didiangaha.
A·dokni Chief Minister-ko grongeanio bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Babadam unit-ni chairman Cyril A Sangma, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSU Western Zone-ni president Tengsan M Marak, GSU Chibinang unit-ni general secretary Kengkrong B Sangma, GSU Eastern Zone-ni vice president Silbil N Marak, GSU Eastern Zone-ni general secretary Aelsebirth M Sangma aro gipinrang ong·a.
AGHJAC-ko dilgiparangni u·iatani gitade, uamangni chief minister-ko gronge agangrikani chu·sokgipa ong·aha maina Sixth Schedule-ko taridapanio da·o ong·enggipa niamrangko bilgridapata dongjawa ine ia tom·anio Chief Minister an·tangan ku·rachakaniko on·ataha.
Constitution-ni Sixth Schedule-ara a·songni Tribal jatrangko chel·chakna dongimin niamrangsa ong·ani gimin ia Sixth Schedule-ko taridapanio skang on·gimin niamrangko pe·genchimode, Tribal-rangna on·gimin bilrangko ra·seka gita ong·gen ineba AGHJAC parakataha.
