SHILLONG: Meghalaya a·dokni dingtang dingtang biaprango donggipa Business Correspondent (BC)-rangko dakchakna gita Mongolbar salo, Meghalaya sorkarini Finance Department aro Meghalaya Rural Bank (MRB), Memorandum of Understanding (MoU)-o soi ka·grikaha. Dolgnini soi ka·grikani somoio a·dokni Chief Minister Conrad K Sangma-ba dongpaaha.
Finance department-ni biapo a·dokni Commissioner & Secretary Dr D Vijay Kumar soi ka·angaha aro Meghalaya Rural Bank-ni biapo MRB-ni Chairperson Tshering Deki baksana OIC NABARD-ni General Manager Naingkhangvung Guite, soi ka·skaaha.
Finance Department aro MRB-ni gisepo soi ka·grikani ja·man talataniko on·angengon, a·dokni Business Correspondent-rangko dakchakna gita MoU-o soi ka·grikanichi financial inclusion-ni miksonganirangko chu·sokatna dakchakani ong·gen aro ia scheme-ni ning·o biming segatgipa manderangnaba a·dok sorkari aro ma·mong sorkarini on·enggipa namgnirangko uamangni bank account-rangona chipatna dakchakani ong·gen ine a·dokni Chief Minister Conrad K Sangma parakataha.
Ian diltugipa biaprango bank-ni kamrangko ka·na dakchakani ong·gen ineba Chief Minister parakataha.
Chief Minister-ni parakatani gitade, ia MoU-o soi ka·grikanichi songadam nokadamrango aro a·dokni diltugipa biaprango tangka paisani gita kam ka·anirango neng·nikanirangko namatna dakchakani ong·gen.
Business Correspondent-rangna BAKDIL, MSRLS, ICVS, CSC aro MRB-ni gipin BC-rang gita dakchakanirangko on·skagen ineba Chief Minister parakataha.
Business Correspondent-rangna micro ATM-rangko on·gen aro ia micro ATM-rangchi uamang songni nokni manderangna tangka paisarangko sokate on·skagen.
