SHILLONG: Meghalaya-o gnigipa changna COVID-19 sabisi sokbataiaonin skanggipa changna da·al Butbar saloni tourism ba kamrang baksana skul aro college-rangko kulipiltaina pilakkon tariengaha.
Ia bilsini May jao jensalo skul aro college-rangko chipaha aroba Covid-19 sabisi batroroako cham-pengna tourist-rangko a·doko napnaba cham-pengaha indiba da·o COVID sabisi man·a komianganichi bon·kame a·dok sorkari minggni dal·dalgipa chanchianiko tik ka·manaha jeon Butbar saloni kulignok.
Songjinmao online gita I-V class-rangko ra·angku-gen, VI-VIII class-rang assignment-rangko on·a aro skigiparangko agangrikna skulrangona re·angna man·aigen aro class IX-XII salanti skulrangona re·bana man·gnok.
Songgadamo VI-XII class-rang salantian class ra·engon class I-V skul kuliao skulrangona re·angna man·gen, bang·a ma·gipa-pagiparangni bi·sarangko skulona watatani gimin aganao skul kulipiltaiako bang·an namnikaha.
Bang·a skulrangan da·-aloni kulignok bi·sarangni naljokanina uamangni micro containment ong·anio Jail Road Boys Higher Secondary School-ni principal, J Pal, pilak protocol-rangko ja·rikgen ine aganaha. “Bi·sarangni skie ra·ani aro uamangni naljokaniba chingni dakgni,” aro bang·bata skigiparangan tika su·manaha aro saksa ba sakgni su· kuja uamangko sal 10 prako RTPCR negative lekkako on·china, ua aganaha.
Sorkarini SOP-rangko ja·rikchina pilakkon ge·etaha, ua aganaha.
Songjinmao ge·gipin sorkarini skigipa saksa indake aganaha uamangni Class XI aro XII-ko dolgni dakna aro ua class-rang antio sal gittam skul re·na nanggen ine bak dakaniko aganaha.
Skigiparangko tika su·china, tanggitik obosta sokaona skulo ge·sa quarantine centre-ko donaha aro skulko salanti sam satgen ine u·iataha. Minggipin skul online aro offline class-rangko ra·anggen ine aganaha.
Skulrang baksana, tourism-koba Butbar-oni kulignok jean a·dokni tangka-paisa bilakatani ja·pang ong·a tourist-rangko a·dokona re·bana on·gnok.
