SHILLONG: Meghalaya a·doko COVID-19-ni giproroaniko champengna gita baditaba jarangna chipe donatani ja·man da·o skulrangko Budbar saloni kulipiltaina a·bachengaha.
Meghalaya a·doko skanggipa changna COVID-19 giproroani ja·man re·anggipa 2020 bilsini March ja dipetan, skul, college aro university-rangko chipe donatahachim aro uandaken skie ra·chakram biaprangko re·anggipa bilsini December jao mitam bakrangkode kulipilahachim. Indake ong·genchimoba ia 2021 bilsini a·bachengtaianio gnigipa changna COVID-19 giprorotaiani ja·man skulrangko chipe donattaina nangao ga·akaha aro uandaken adita salrangna skangsan a·dok sorkari, chanchirimangtaienba niamrangko done skulrangko kulipiltaina tik ka·angaha.
Budbar salo skulrangko kulipiltaianio chatro chatrirangni skulrangchi re·ruraanirangko bang·e nikna man·jahaoba, skulrangchi re·enggipa chatro chatrirangni mask-rangko gane re·anirangko nikna man·skaaha.
Indita jarangna skulrangko chipe donengmiting somoio bang·bata skulrangan internet gita class-rangko ra·ahaoba, a·dokni bang·bata biaprangon internet-rangko name man·rongjani gimin chatro chatrirang class-tangtangko ra·anio neng·nikanirangko chagrongna nangahachim aro uandaken da·o skulrangko kulipiltaianiara chatro chatrirangna aro mongsongbate board porikkarangko sena sienggipa chatro chatrirangna rang·speaniko on·ani gita ong·aha.
Meghalaya a·doko skulrangko kulipiltaina tik ka·angani bidingo a·dokni Education Minister Lahkmen Rymbui, talataniko on·angengon, chatro chatrirangni namgninasa chanchie ia ja·kuko de·aha ine parakataha.
Skulrangko bilsisa atamang ong·pile chipe donna nangahani gimin chatro chatrirangna, skulrangko kulipiltaina nangaha ineba ua aganaha.
Education Minister-ni aganani gitade, skulrangko kulipiltaianiara chatro chatrirangni namgnian ong·engani gimin skigiparangba skulrangko kulipiltaina tik ka·aniko kusi ong·en ra·chaktokaha.
Skulrangko kulipilengon, an·tangtangni skulrango COVID-19 man·anirang donggenchimode ta·raken ja·kurangko de·china gita skul managing committee-rangna ge·etaniko on·manaha ineba Rymbui parakataha.
“An·chingni chatro chatrirangna a·gilsakni seng·aniko on·na nangchongmota indiba uamangna an·seng baljokaniko on·anian sorkarini mongsonggipa daitoba ong·a,” ine Rymbui aganaha.
Skigiparang pilakkon COVID-ni tikarangko su·e ra·china didiatengon, je skigiparangna tikarangko su·kujachim, uamangde sal 10-prakon RT-PCR-ni test ka·e negative ong·ani report-ko on·skana nanggen ine Education Minister parakataha.
Skulrangko kulipilengon, chatro chatrirang skulrangchi re·chongmotna nanggen ong·ja aro ian ma·a paarangni skani gitaba ong·na amaigen ineba Education Minister talataniko on·angaha.
