TURA: Budbar salo, Rongjeng Civil Sub-Division Demand Committee (RCSDDC)-ni dilgiparang, Meghalaya a·dokni Chief Minister Conrad K Sangma-ko grongenba, Rongjeng-ko civil sub-division songchina dabienggipani bidingo gisik ra·ataniko on·na gita memorandum-ko on·angtaiaha.
Committee-ni dilgiparangko, Rongjeng-ni MLA Jim Sangma dilangaha aro uamang re·anggipa February-ni 23 tariko Chief Minister-na on·gipa apsan memorandum-kon Chief Minister-na on·attaiaha.
Iani bidingo Meghalaya a·dokni Chief Minister Conrad Sangma-na sedoatengon, Dambo-Rongjeng Development Block-ko 1962 bilsion Assam sorkarini somoio songe on·ahani gimin Garo Hills-o gitchambatsranggipa block-rangoni ge·sa ong·a aro ia Rongjeng Block-ko 1980 bilsirangonin civil sub-division songchina gita dabianirangko dakengahachim ine Rongjeng Civil Sub-Division Demand Committee parakataha.
2011 bilsini census gita Dambo-Rongjeng Development Block-o mande jelbra jelsuani sak 52,584-mang ong·a aro ian block-ni gita niatgenchimode manderangni jelbra jelsuani nangana batahani gimin dingtang dingtang kamrangko ka·anio neng·nikanirangko chagrongna nangtokengaha ine Demand Committee-ni dilgiparang parakataha.
Indake ong·engon, Rongjeng jolo songdongenggipa manderangni dabiani gita sorkari, sub-division-ko songna cholrangko nienga ine Chief Minister, Demand Committee-ni dilgiparangna ku·rachakaniko on·ataha.