TURA: South West Garo Hills a·jani Mahendraganj gita aro West Garo Hills a·jani Dalu gita Bangladesh-ona ro·ongrangko salruraengani a·sel ramarang nosto ong·atako man·engahani gimin adita salrangna skang, Mahendraganj Police Station-ni ning·o donggipa Babupara songni me·chikrang, ia rama gita ro·ong salruraenggipa garirangko champenge jingjengatangtokaha ine kobor on·aha.
Jolo songdongenggipa manderangni u·iatani gitade, Bangladesh a·songona ro·ong salangenggipa truck garirang, Mahendraganj bazar-oni Barmanpara songona dakanggipa rama gita salantian ro·ongrangko salangengani a·sel da·o ia ramarang nosto ong·atako man·tokengahachim.
“Mahendraganj bazar-oni Barmanpara songona dakanggipa ramako dam 12 songni manderang re·rurana jakkalenga indiba ia rama gita salantian ro·ong salgipa garirang re·ruraengani a·sel da·o ia ramani obosta namsrangjaengaha aro ja·achi re·ruraenggipa manderangba neng·nikanirangko man·tokna nangengaha,” ine Mahendraganj jolo songdongenggipa mande saksa parakataha.
Ia rama gita ro·ong salgipa truck garirangni re·ruraengani a·sel ramarangsan nosto ong·atako man·jaenga indiba songni nokni manderangnaba kenchakna nangani ong·enga ineba jolni manderang parakataha.
Indake ong·engon, ia rama gita ro·ong salgipa truck garirangni re·ruraaniko sorkari champengjaengani gimin jolo songdongenggipa manderang aro mongsongbate me·chikrang, ia ramako dikdiksa champengataha aro ia rama gita ro·ong salgipa truck garirangni re·ruraaniko dontongchina dabiangtokaha ine u·iataha.
Me·chikrangni iandake ramako champenge jingjengatengmiting somoio ja·mano police-rang ua biapona re·bae jingjengatgipa manderangko a·rikgalataha aro mikkangchi iandake ramako champengtaigenchimode pattoko chipatgen ine mikrakataniko on·angskaaha.
