Tura, Sept 6: Garo Hills Autonomous District Council (GHADC)-ni deputy Chairman-ko seokna gita election-ko ong·atna siengon, deputy chairman-ni biapna Executive Committee (EC)-ko dilenggipa NPP aro Opposition Congress doloni susagriktaina siengaha.
GHADC-o deputy chairman-ni election-ko Budbar pring 11:00 bajini ja·man ong·atanggen ine GHADC-ni session-ko a·bachengatani salo Chairman Rakesh A Sangma parakatahachim. Ia election-na nomination-ko on·ani bon·kamgipa somoiara Mongolbar salni 3:00 baji ong·gen.
Deputy chairman-ni biapna susana gita NPP dol, Siju-ni NPP MDC Albinush Marak-ko minge donataha aro Congress dolni gitaba Resubelpara-ni MDC Rinaldo K Sangma-ko minge donsoskaaha.
Da·o dipet NPP-chi dilenggipa EC-o sak 16 MDC-rang dongengon Opposition-o sak 12 MDC-rang dongskaachim.
Tura-ni BJP MDC Bernard N Marak-de da·o dipet opposition bench-o asongengoba darangnaba chakpaaniko on·skakujaengachim.