SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·ote galanina jegale Mongolbar salo, dingtang dingtang dolrangni nangrime bikotgipa ‘Sur Ehrngiew ki Nong Malki’ dolni gita jinma mombati so·e tom·bimonganiko Malki playground-o ong·atangaha.
Ia tom·anio KSU, FKJGP, HYC, HNYF, Seng Samla Malki aro uandakgipa dingtang dingtang dolrang bakko ra·angaha aro HNLC-ni gitcham dilgipako so·ote galani gimin a·dok sorkariko aro police-rangni kosako jegalangtokaha.
HNLC-ni gitcham dilgipako so·otanio jak donggipa police officer-rangko kam dontongatchina aro so·otako man·gipa Cheristerfield Thangkhiew-ni nokdangna kakket bichalko on·china gita dabie ia tom·anio manderang jinma inchrotokaha.
Ia tom·anio Cheristerfield Thangkhiew-ni nokdang aro uni bakdrangrangba bakko ra·angtokaha aro Cheristerfield-ko so·ote galani gimin sorkari aro police-rangni kamko sing·doangaha.