TURA: Tura-ni samba jolo donggipa Pelga dareo gimagipa mandeni manggisiko Budbar pringo, SDRF aro Fire & Emergency dolni sipairang, sandie man·pilaha.
Koborko on·ani gitade, ia mande re·anggipa Robibar salo gimaahachim.
Police-rangni u·iatani gitade, Pradeep Saha minggipa mande saksa, Robibar salo an·tangni nokdang baksa picnic cha·na Pelga dareona re·angahachim indiba ua chio jrona ine napangon, uko ta·rakbee jokenggipa chi man·pakangahachim.
Ia mandeni chio gimaani ja·man, songni manderangni dakchakanichi sipai dolrang, salgittamna kingking sandioba man·pilkujaengachim.
Indake ong·genchimoba, Budbar pringo SDRF aro Fire & Emergency dolrang, ia mandeni manggisiko ia dareni ka·ma jolo donggipa chiningoniko man·pilaha aro ja·mano ia mandeni nokdangna kobor on·ataha.
