TURA: Indian Constitution-ni Sixth Schedule-ko taridapanio village council aro municipal council-ko songna Meghalaya sorkarini recommend ka·atna manchianiko jegalenba, Budbar salo Garo Hills gimikni Nokmarang, dingtang dingtang NGO-rang aro Garo Hills-o songdongenggipa bang·bea manderang, Tura-o jinma tom·e re·jomaniko ong·atangaha.
Jinma re·jomaniko ong·atna skang, Tura-ni Nokma Council office mikkango jinma tom·aniko ong·atangchengaha aro ia tom·bimonganio Nokma Council-ni dilgiparang aro dingtang dingtang dolni dilgiparang, jinmana aganprakengon, Garo Hills-o village council aro municipal council-ko songna gita a·dok sorkarini recommend ka·atna manchianiko jegalangtokenba, Sixth Schedule-ko taridapanio Nokmarangna on·gimin bilko aro A·chikrangni ja·rikbaenggipa daka rikanirangko dingtangatjachina dabiangtokaha.
Ia tom·anio Nokma Council baksana bakko ra·anggipa dingtang dingtang dolrangara, GSU, ADE, AYWO, FAF, FKJGP, GGU, Williamnagar Bar Association aro gipinrang ong·achim.
Sixth Schedule-ko taridapna gita ma·mong sorkarina recommendation ba ku·pattianirangko on·atna skang, Garo Hills-ni manderang baksa agangrikchengchina aro dingtang dingtang dolrangni nangnikanirangko knae ra·chengchina gitaba ia tom·anio dingtang dingtang dolni dilgiparang, a·dok sorkariko didiangaha.
Jinma re·jomaniko Nokma Council office-oni a·bachengate, Tura DC office gita Tura Bazar-ona wenange, ja·mano SBI main branch gita re·bapile apsan biapon matchotateaha.
Re·baenggipa September-ni 10 tariko a·dokni Chief Minister Conrad K Sangma, Sixth Schedule-ko taridapani bidingo dingtang dingtang dolrang baksa chanchirimtaina siengani gimin ia tom·anio Garo Hills-ni Nokmarangba bakko ra·e dingtangmancha an·tangtangni nangnikanirangko Chief Minister-na janape on·anggen ineba ia tom·anio Nokma Council aro dingtang dingtang dolrang tik ka·e donangaha.
Photo: Sixth Schedule-ko taridapna sienggipani bidingo Garo Hills-ni Nokmarang aro dingtang dingtang dolrangni nangrime jinma tom·e re·jomaniko ong·atanio bang·bea manderang bakko ra·enga.
