TURA: Re·anggipa August jao manderangni tangkako oke katgipa mande saksako East Garo Hills a·jani police-rang, Budbar attamo Jharkhand a·dokoniko rim·na man·aha.
Koborko on·ani gitade, manderangni tangkarangko oke katani ja·man East Garo Hills a·jani SP, mokordoma ka·enba, cha·ugipa mandeko sandina a·bachengaha aro uandaken cyber gita kamko ka·e ia mandeko Jharkhand a·dokoniko rim·na man·aha.
Rim·ako man·gipa mandeara Jharkhand a·doko donggipa Pandri songoni bilsi 22 ong·gipa Pappu Thakur ong·achim aro ia mandeko East Garo Hills a·jani Police-rang, Taratand police-rangni dakchakanichi rim·na man·aha.
Ia sal somoirango manderangko cha·bokgipa manderang, phone-rangko ka·atenba, bank-ni gimin sing·sandie tangka paisarangko oke katrongengachim ine nikna man·a.
