AMPATI: Sukrobar salo, World Suicide Prevention Day-ko South West Garo Hills a·jani Zikzak Multi Facility Centre-oba maniangaha aro ia salko manianio District Mental Health department-ni gita dingtangmancha Mental Health Helpline nomborko a·bachengate on·angjolaha. Ia World Suicide Prevention Day-ko manianio South West Garo Hills a·jani Deputy Commissioner Ch Ramakrishna, Additional SP Rupam R Marak aro gipin officer-rangba dongpae bak ra·angaha.
Ia sal somoirango manderang aro mongsongbate chadamberangni an·tangtangko so·ote sianirang batroroengani gimin so·ote sianirangko champengna aro komiatna gita ia helpline nombor-ko a·bachengataha aro ia nomborara 9362749485 ong·enga.
Ia tom·anio South West Garo Hills a·jani Deputy Commissioner Ch Ramakrishna, jinmana aganprakengon, ia nombor gita an·tangtangni nangan somoirango agan-ku·pattigipa manderangna, an·tangtangni neng·nikanirangko u·iatchina jolo songdongenggipa manderangko didiataha.
SWGH a·jao so·ote sianirangko komiatanide sorkarini daitosan ong·ja indiba pilakan nangrime kamko ka·na nanggen ineba DC aganaha.
Ia program-ko ong·atanio SWGH a·jani ASP Rupam R Marak-ba jinmana aganprakengon, badiaba somoirangode chadamberang, mobile phone-rangko bree on·china dabianiko ma·a paarang knachakjani giminan an·tangtangko so·ote sienga ine talataniko on·angenba, dedrangni kamrangko name nirikkichina aro dedrangko dal·atanio simsakbegiparang ong·china gita ma·a paarangko didiangaha.
Ia tom·anio District Mental Health Program-ni District Nodal Officer Dr Matgrik Sangma-ba jinmana aganprakangengon, an·tangtangko so·ote sina sienggipa manderang pangnan, ku·rangchi ba social media-rangchi chinrangko mesokrongani gimin nokdangni manderang, iandakgipa chinrangko namrenge ra·na nangja ine didianiko on·angaha. Gisikni gita dongtojaenggipa manderangni chinrangko name nigenchimosa so·ote sianirangko champengna man·gen ineba ua aganaha.
See rakkianiko parakani gitade, 2020 bilsimangmangon Zikzak aro Betasing jolrango sak 22 manderang, an·tangtangko so·ote siahachim aro 2021 bilsini gisepo SWGH a·ja gimiko sak 13 manderang an·tangtangko so·ote siskaahachim. An·tangtangko so·ote sigipa manderangara bilsi 18-oni bilsi 45 ong·gipa aro una batgiparangba dongachim.
