Covid-ni a·selsa SCIC-ko seokanio jaroenga: CM Conrad

 

Shillong: State Chief Information Commissioner (SCIC)-ko aro Meghalaya State Commission for Women (MSWC)-ni chairperson-ko seokanio Covid-19 sabisini a·selsa somoi bakroe ra·enga ine a·dokni Chief Minister, Conrad K. Sangma mejal Sombar salo agan-talataniko on·aha.
Meghalaya State Information Commission (MSIC)-o re·anggipa bilsi October jaonin chairperson aro uni membor-rangko seokna man·kujaenga aro apsandake, ia bilsini March jao gitcham cheif secretary, PBO Warjri-ni kam ka·ani bilsi ba somoi matchotani ja·manonin da·ona kingkingba SCIC-ko seoktaikujaengachim.
Chief Minister-ni mejalo kobor ra·timgipa manderang baksa agangrikengmitingo janapani gita, MSCW-ni chairperson aro membor-rangko seokanio chu·gimik niamrangko ja·rikna nangao ga·aka.
Uni parakani gitade, commission-ni membor aro uni chairperson-ko seokanio saksa kuturio asongari kamrangko ka·atna man·ja, maina uko seokanio bang·a nangchapgipa niamrangko ja·rikna nangchongmota.
“Commission-ni chairperson aro membor-rangko seokanio bang·a doskasrangko namedake nirikkie ra·chengna nangao ga·akachim. Uarangko chinga covid sabisina neng·nikani a·selo manchie donsogimin somoi gita matchotatna man·skajaenga. Uandake, membor seokanio chu·gimik bakon jaroatna nangao ga·akskaaha,” ineba Sangma parakataha.
Indake ong·engon, chairperson aro membor-rangko seokanio covid sabisina neng·nikanirang donggenchimoba, somoi gita senggnang matchotatna kamrangko ta·raken ka·enga ineba ua agandapaha.

Get real time updates directly on your device, subscribe now.

Comments are closed.