SHILLONG: Meghalaya-ni mongsonggipa jatrang, chong·motan Khasi, Jaintia aro Garo jatrang jatsa jatgipin baksa meli-nangrimgrikani dongsrangja aro jatsa-jatgipin baksa ma·ekgrikani gisikrang dongenga ine opposition-ni dilgipa Dr Mukul Sangma mejalo in Meghalaya Assembly session-ni ja·mano kobor ra·timgiparangna an·tangni duk ong·ako parakaha.
Dr Sangma kobor ra·timgiparangna aganengon, Meghalaya-o mongsongbatgipa neng·nikanide a·dokni mongsonggipa jatrang ge gittaman da·ona kingkingba jatsa jatgipin baksa ma·ekgrike dongkuenga ine aganaha.
“Anga ia ong·chongmotgipa obostako an·tangni janggi tanganio aro politician ong·e jatko re·dilbaanio namedaken ma·sie ra·na gita man·aha,” ine a·dokni gitcham Chief Minister an·tangni suk ong·gijako parakaha.
Uni agan-parakani gitade, manderangni seokatako man·gipa MLA-rang, chong·motan Congress party aro je political party-rangoniba ong·china, a·dokni mongsonggipa jatrangoni darangan meligrikna man·teljaenga.
A·dokni mongsongbatgipa jatrang ge 3-oni je jatba chubatgipa gadango dilgipa ong·china, unon pangnaba maina A·chikrangoniko CM seoka, maina Khasi jatoniko CM seokchekcheka ingipa kattarangko nakatronga ineba ua aganaha.
“An·ching je jatoniba ong·china, jatsa jatgipinko mikbu-mitakgrike dongaiode, a·dokko silroro-namroroatna man·jawa. An·chingo indakgipa namgijagipa chanchiani dinggenchimode uarnagko galna nanggen. Unigimin, a·doko mongsonggipa ong·e dongdonggipa jatrang, chong·motan, Garo, Khasi aro Jaintia jatrangna agreba, gipin jatrangba Meghalaya a·dokko mikkangchi silroro-namroroatna gita jatsa jatgipinrang baksa mikneng-mikbugrikgija hai mikkangchi ku·mong-nangrime janggi tangna aro a·dokko rikna,” ineba Sangma ku·mongani kattarangko aganangjolaja.