SHILLONG: Meghalaya a·doko Tribal ong·gijagipa manderangko badiaba badiaba dolrang, dokkol ka·na jotton ka·enga ine ding·chaoataniko ra·bana gita social media-rango watpripragipa Vicky Dey-ko police-rang rim·na man·kujaenga ine Budbar salo, a·dokni Chief Minister Conrad K Sangma, Assembly-ni Session-o parakataha.
Ia mandeni kosako FIR ka·aoni da·o bilsisa ong·pilengahaoba rim·na man·kujaengani gimin Assembly-o sing·anina aganchakaniko on·angengon, dingtang dingtang jatrangni gisepo ding·chaogrikaniko ra·bana miksonge tarigipa video-ko watpripraahani gimin Vicky Dey-ni kosako 2020 bilsini September jao, Lumdiengjri Police Station-o FIR ka·ahachim ine Sangma parakataha.
Meghalaya a·dokni Ichamati jolrango Tribal ong·gijagipa gipin jat manderangko mitam dolrang, dokkanrangko chipdraatenga ine Vicky Dey minggipa mande, social media-o matnangatahachim.
Vicky Dey-ni kosako FIR ka·ani ja·mano ia case-ko Shella Police Station-ona ra·angskaaha aro ia a·selni bidingo ning·tue sandina a·bachengataha ine Chief Minister parakataha.
2020 bilsini October jaoba, Vicky Dey, Prontush Sarkar, Mridul Das aro Binayak Roy-ni kosako, Governor aro Prime Minister-ni office (PMO)-ko dilsretna jotton ka·ahani gimin FIR ka·doangtaiaha ineba Sangma aganaha.
Ia a·selrangni bidingo North Goa aro South Goa-ni SP-naba u·iate, ia mandeko sandichina u·iatahachim indiba ia mandeni bidingo koborko man·jaenga aro iani bidingo ine Chief Minister parakataha.
Iana skang, ia obostani bidingo Umroi-ni MLA George Lyngdoh, Assembly-o sing·doangengon, Meghalaya a·doko songdongenggipa manderangni kosako matnanggipa Vicky Dey-ni kosako FIR ka·ani bilsisa ong·na sipilengahachim ine parakataha.
Ia mandeni kosako police-rangni ja·ku de·na man·jaengania, mikkangchi ia mandena iandakgipa kamrangko ka·na ka·dongbatatani gita ong·gen ineba Lyngdoh aganaha.
Indake ong·genchimoba, Police department-ni kosako iandake matnanganiara kraani ong·ja maina police-rangan, a·dokni manderangko chel·chakna gita an·tangtangko on·kange kam ka·enggiparang ong·a ine Chief Minister Conrad K Sangma parakatskaaha.