TURA: Re·anggipa Mongolbar walo, Tura-ni Sherwood School samba jolo police-rangko AK-56 automatic rifle-chi gochengani ja·man police-rangni jako so·otako man·gipa mandeara, skango UALA aro ASAK bobil dolrangna kamko ka·gipa mandesa ong·achim ine police-rang ma·sina man·aha.
Mongolbar walo, Tikrikilla jolo donggipa Raksamgre songni Robison R Marak minggipa mande saksa, Daldagre gittimona dakanggipa ramao police-rang baksa gogrikani ja·man so·otako man·ahachim aro ua biaponiko police-rang, AK-56 rifle baksana guli bikrok aro tanggipa gulirangkoba man·ahachim.
West Garo Hills a·jani SP Vivekanand Singh Rathore-ni kobor ra·timgipa manderangna u·iatani gitade, police-rang baksa gogrikanio so·otako man·gipa mandeara, 2014 bilsioni 2018 bilsirangona bobil dake chakatgipa United A·chik Liberation Army (UALA) aro A·chik Songna An·pachakgipa Kotok (ASAK) dolrangna a·palo donge kam ka·timgipa mandesa ong·achim.
Ia bobil dolrang bame on·ani ja·man, Robison Marak, West Garo Hills a·jani dingtang dingtang biaprango tangka gildrae ra·na, mande rim·gittangna aro uandakgipa ong·gija kamrangko ka·na a·bachengskaahachim.
Mongolbar walo ong·anggipa a·selni bidingo talataniko on·angengon, Daldagre jolo ma·sina man·gijagipa manderangni silchidare ra·e re·ruraanirangko kobor man·soenba police-rangko ua biapona watataha ine SP parakataha.
“Police-rang ua biapona re·ange dingtang dingtang biaprango re·ruraenggipa manderangko nirikkina a·bachengaha aro attamni 7:30 bajimango, nirikkienggipa police-rangni dolsa, Tura Garobadha ramachipakni bike-o Daldagre rama gita re·baako niksoaha. Police-rangko nikon ua bike-oni bilone, police-rangko gona a·bachengaha aro police-rangba uko gochakskaon ua guli nange siaha,” ine Rathore parakataha.
Gogrikgipa biaponiko police-rang sandion, AK-56 rifle baksana tangkuenggipa guli rong 19, guli bikrok rong 5 aro 9 mm pistol gulini rong 20 bikrokrangko man·aha ineba SP parakataha.
Ia mandeni gadoe re·bagipa Bajaj Platina motorcycle gisimkoba police-rang rim·e ra·angaha.
Bilsisnimangni gisepo Tura-o skanggipa changna dolgni gogrikaniko nikna man·taiaha.