SHILLONG: Assam a·doko Cattle Prevention Bill 2021-ko ra·gatanichi Meghalaya a·dokoba nangchakeaniko man·enga ine Bristibar salo, a·dokni Animal Husbandry & Veterinary (AH&V) Minister Sanbor Shullai, Assembly-o parakataha.
Assembly-ni Autumn Session-o MLA-rangni sing·anina aganchakaniko on·angengon, Assam a·doko Cattle Prevention Bill-ko ra·gatani a·sel Meghalaya-oba nangchakeaniko man·engani gimin a·dok sorkari, Assam-ni Chief Minister Himanta Biswa Sarma-na sedoataha ine Shullai parakataha.
“Chinga Assam sorkarini aganchakanina sengkuenga aro Assam-oni maming aganchakanirangko man·sojagenchimode mikkangchi ja·kuko de·angna gita a·dok sorkari asonge chanchianggen,” ine AH&V Minister aganaha.
KHNAM-ni MLA Adelbert Nongrum-ni sing·anina aganchakaniko on·angkaengon, Meghalaya a·doko matchu badinggiparangna transit pass-ko on·ani bidingo sorkari u·iataniko on·manaha aro matchurangko salbana gita bakan matchu badinggiparangna transit pass-rangko on·gnok ine Shullai parakataha.
AH&Vety Minister-ni parakatani gitade, a·doko matchu be·enni damrang tang·doangaha ine matchu be·en palenggipa aro bree cha·enggiparangni u·iataha.
Da·o dipet matchu be·enni damko kg-prako tik ka·e on·china gita AH & Vety department-ona proposal-rang sokbaa dongkuja ineba Shullai parakataha.
Matchu badinggiparango chu·onga gita nanggipa lekkarang donggenchimoba Assam-o matchu badinggiparangko dokkol ka·na jotton ka·enga ine Nongpoh-ni MLA Mayralborn Syiem-ni suk ong·gijaniko parakaton, iani bidingo Meghalaya a·dokni AH & Vety department, Assam-ni Veterinary department baksa agangrikna ja·kuko de·enga ine Shullai parakatskaaha.
Iani bidingo agan-ku·pattina nanganirang donggenchimode sorkari baksa apsan asonge chanchirimna gita re·bae agangrikena man·gen ineba ua Assembly-ni pilak membor-rangkon didiataha.
