TURA: Tura-ni District School Education Officer (DSEO) Ella Begum-ko Baghmara-ona ra·ange DSEO songskaengani gimin jegalsoe, South Garo Hills a·jani dingtang dingtang NGO-rang, re·anggipa Budbar saloni a·bachenge Baghmara-ni DSEO office-ko kam ka·na on·gija jingjengatangaha.
Ia office-ko picketing ka·e jingjengatenggipa dolrangara, GSU Southern Zone, ADE, FKJGP aro South Garo Hills a·jani dingtang dingtang dolrang ong·a aro uamang ia officer-ko Baghmara-ona ra·jitanganiko jegale ia office picketing-ko ka·enga ine u·iataha.
“South Garo Hills a·jaona namgijagipa officer-rangko ra·ange galaniko chinga raken jegalenga aro ia DSEO-ko chinga maming dakeba South Garo Hills a·jao nokchaksona man·jawa. Chinga Budbar salonin ia office-ko kam ka·na on·gija jingjengatengaha indiba da·onan chingna maming aganchakanirangko on·kujaenga,” ine DSEO office-ko picketing ka·enggipa dolrang, Bristibar attamo parakatenba, NGO-rangni jegalaniko sorkari knachakjagenchimode ia office-ko dontonggija picketing ka·angkugen ine mikrakataniko on·angaha.
Batanggimin somoirango ia apsan officer-kon West Garo Hills a·jaoba DSEO songani gimin dingtang dingtang dolrang raken jegaltokahachim aro uko ta·raken kamoniko ra·galchina dabitokahachim ine nikna man·a.
