TURA: Garo Hills-ni dambonga a·jarango donggipa gitcham sipairangna, sianggimin sipairangni jikgiparangna aro uamangni nokdangrangna September-ni 16 aro 17 tarikrango salgnina medical camp-ko Tura Dakkopgre-o donggipa SMELC building-o ong·atenga. Ia medical camp-ko ong·atanio gitcham sipairangna CSD-ni cholrangkoba on·angjolenga.
Tura-o Zila Sainik Welfare Office-ko kulichengaonin iandakgipa medical camp-ko gitcham sipairangna ong·atchina gita Meghalaya a·dokni Chief Minister aro Rajya Sainik Board-ni president Conrad K Sangma nangnikengachim indiba COVID sajinmani a·sel ia program-ko ong·atningna man·jaengachim. Indake ong·engon, ia medical camp-ko ong·atna gita dakchakaniko on·china GOC 101 Area-ko mol·molatahani gimin ia medical camp-ko ong·atna GOC-ni AVSM Lt Gen KC Panchananthan, dakchakaniko on·angaha.
Ia medical camp-ko ong·atanio dingtang dingtang specialist doctor-rang, jekai gynaecologist, medical, ENT, eye specialist aro uandakgipa doctor-rang dongpae manderangna sanna bananirangko on·enga aro ia camp-o Garo Hills gimikni sak 200-na baten gitcham sipairang aro uamangni nokdangrang bakko ra·tokenga.
Ia medical camp-ko ong·atna gita West Garo Hills a·jani Deputy Commissioner Ram Singh-ba pilak nanga dakchakanirangko on·angaha aro ua an·tangan ia medical camp-ona re·ange, gitcham sipairang aro uamangni nokdangrang baksa agangrikeaha.
Apsan daken, Tura-ni BSF Sector HQ-ni gitaba ia medical camp-ko ong·atna dakchakanirangko on·angaha aro ia camp-ko ong·atanio Meghalaya Rajya Sainik Board-ni Director Retd Col GK Rai, Tura ZSWO-ni Retd Col MM Singh-ba dongpae nirokaniko on·angaha.