SHILLONG: 2021-22 bilsini gisepo gital district aro sub-division-rangna dabianirangko Meghalaya sorkari niengkua ine Sukrobar salo, a·dokni Chief Minister Conrad K Sangma, Assembly-o parakataha.
Assembly-ni session-ko ong·atanio George Lyngdoh-ni sing·anina aganchakaniko on·angengon, da·o dipet a·dok sorkari, Mairang sub-division-kosan district-ona ra·doatna manchiengkua aro gipin dabianirangkode nipilengkua ine Chief Minister parakataha.
Gital district aro sub-division-rangko songanio biap, mandeni jelbra jelsuani, da·o ong·enggipa district/sub-division headquarter-rangoni chel·grikani aro uandakgipa dingtang dingtang nanganirangkoba nina nanggen ineba Chief Minister parakataha.
Minggipin sing·aniko dakangskaengon, district aro sub-division-rangko songchina dabianirangko sulsul mesokchina gita George Lyngdoh, sorkario dabiangaha.
Iana aganchakaniko on·angskaengon, da·o dipet sorkario mingchet proposal-rang donga indiba ian bon·kamgipa ong·kujawa ine Chief Minister parakataha.
