SHILLONG: Re·anggipa bilsioni dipet James Sangma-ni home department-ni portfolio-ko watgalani ja·manoba, power department-ko jako ra·e challaianio bang·a kamrangan tik ong·ja ine uni kosako matnange NGO aro gipin political party-rangoni jegale hala ka·ani ja·mano a·dokni Chief Minister, Conrad Sangma, mejal Sonibar salo bon·kame uni adatangni power portfolio-ko jako ra·engaoniko ra·galpile sakbri gipin cabinet minister-rangna jujaate on·skaaha.
James Sangma, re·anggipa bilsio Home Department-ko watgalani ja·mano, ian gnigipa changna Power department-ni portfolio-oniko ra·galattaienggipa ong·skaengon, minister-na uni bangki dongkuenggipa portfolio-rang jekai, food, civil suppliy aro consumer affairs, Forest & Environment, Law, Taxation, Registration aro Stamps department-ko jako ra·angkuengana agreba, una Health aro Family Welfare department-ni portfolio-ko on·angskaaha.
Mejal Sonibar salo sorkarini chugipa gadangni on·atgipa hukumo, Deputy Chief Minister, Prestone Tynsong-na uni jako ra·enggipa Housing, Parliamentary Affairs aro Public Works Department (Roads)-na agreba, una da·o power department-ni portfolio-ko on·dapatskaaha.
Indake ong·engon, Sniawbhalang Dhar-na Tourism, Commerce & Industries, Urban Affairs, Minister Municipal Administration, General Administration aro Fisheries Department-rangko aro Dasakhiatbha Lamare-na Transport aro Public Works (Buildings) Department-rangko on·angskaaha ineba koborna u·iataha.
