NEW DELHI: Ma·ani chatchiko ra·e songdonggipa Meghalaya a·doko me·chikrangni kosako kragija dakanirangko bang·e nikna man·enga. Niatgenchimode National Crime Records Bureau (NCRB)-ni report-ni gita Northeastern a·jolni gipin a·dokrangna bate Meghalaya a·doko me·chikni kosako kragija dakani batrikrikenga.
Re·anggipa 2020 bilsio Meghalaya-o me·chikrangni kosako kragija dakanio ming 568 case segata donga, jean Manipur, Nagaland, Mizoram, Sikkim aro Arunachal Pradesh-na bata. Dal·batgipa aro mande jelbatgipa a·dokrang Assam aro Tripura-oba apsan daken obosta ong·ako nikna man·aha.
Uandake Meghalaya-o me·chikrangko kragija dakani obostarang batrikrikenga, indiba gipin Northeaster a·dokrang jekai Assam, Arunuchal Pradesh aro Tripura-on komibatpilenga.
Niatgenchimode batanggimin somoirango iandakgipa obosta ong·ako bang·en Assam-o nikna man·aha, 26,352 case segata donga. Assam-ni ja·man gnigipao Tripura (874), Meghalaya (568), Arunachal Pradesh (281), Manipur (247), Mizoram (172), Sikkim (140) aro Nagaland (39).
Meghalaya a·doko til·eka, rim·gitanga, nokdango kajia golmal ong·a obosta ong·anirang bata. Meghalaya a·dok damsaon 2020 bilsio me·chik kal·akani ming 67 case segata donga. Ian bang·batgipa figure ong·a.
Meghalaya-o songdonggiparang me·chikni chatchiko de·e janggi tanggipa aro nokdangni mongsonggipa dilgipa ong·genchimoba, Meghalaya-on iandakgipa obostarangko bang·e nikna man·enga. Indiba ia changde ma·mong sorkari, Meghalaya a·doko Northeaster-ni gipin a·dokrang baksa tosusae niate chong·mot figure-ko parakataha.
