MLP aro MPSC-o kam on·aniko ta·rakatchina didie NGO-rang, a·dokni DGP aro Chief Secretary-ko grongea

TURA: Meghalaya a·doko kamgri ong·e dongenggipa chadamberangni namgnina Meghalaya Police aro Meghalaya Public Service Commission (MPSC)-o kam on·aniko ta·rakatchina didie adita salrangna skang, Garo Hills-o dingtang dingtang dolrangni nangrime bikotgipa All Garo Hills Joint Action Committee (AGHJAC)-ni dilgiparang, Meghalaya a·dokni Director General of Police (DGP) R Chandranathan aro a·dokni Chief Secretary MS Rao-ko Shillong-o grongeaha.
A·dokni DGP aro Chief Secretary-ko grongenio dongpae bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Garobadha unit-ni chairman Ryan Ch Marak, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSU Western Zone-ni president Tengsan M Marak, GSU Chibinang unit-ni general secretary Kengkrong B Sangma, GSU Eastern Zone-ni vice president Silbil N Marak, GSU Western Zone (North)-ni publicity secretary Raj Mark Ch Momin aro GSU-CEC-ni vice president Frenky Marak ong·achim.
A·dokni DGP-ko gronge AGHJAC-ni dilgiparang agangrikengon, Meghalaya Police-o bangbang ong·e dongenggipa MPS, UBSI, ABSI aro Constable-ni kamrango ta·raken gapatchina gita didiangaha.
West Garo Hills a·jao aro mongsongbate Tura jillao, skul aro office-ni somoirango garirang apchangket ong·rongani a·sel manderang neng·nikanirangko chagrongna nangengani giminba garirangni apchangket ong·aniko namatna ja·kuko de·china aro traffic police-rangna nambate training-rangko on·china gitaba JAC-ni dilgiparang, a·dokni DGP-ko didiangaha.
Badiaba badiaba police station-rango police-rang chu·ongjaengani a·sel kamrangko name ka·na man·jaengani giminba AGHJAC-ni dilgiparang, DGP baksa agangrikangaha aro ia police station-rango chu·onga gita sipairangko donatchina didiangaha.
A·dokni Chief Secretary MS Rao-ko gronge agangrikangskaengon, 2017 bilsio a·dokni gitcham Chief Minister Mukul Sangma-ni jakchi pangchakaniko songe on·gipa Captain Williamson Sangma Technical University-ko ta·raken a·bachengatchina AGHJAC didiangaha. Jewilgre-o Architecture & Urban Planning College rikaniko ta·rakbatatchina aro Tura Medical College-ko ta·raken matchotatna nangengani giminba AGHJAC-ni dilgiparang, a·dokni Chief Secretary baksa agangrikangaha.
Tura-o matchotkugijagipa Governor’s House, Tura-o Winter Session-ko ong·atna dabiani, Tura-o competitive exam centre-ko kulichina dabiani aro uandakgipa dingtang dingtang kamrangni giminba AGHJAC, a·dokni Chief Secretary-ko grongani somoio agangrikangjolaha.